Маці і дачка Міронцавы выйшлі на волю пасля паўгода ў СІЗА

Лукер’я і Вераніка Міронцавы, якіх судзілі па “экстрэмісцкім” артыкуле, вызваленыя адразу пасля абвяшчэння прысуду. Як паведамляе “Нашай Ніва”, судовы працэс над маці і дачкой завяршыўся прызначэннем “хатняй хіміі”, то бок абмежавання волі па месцы жыхарства.

Беларускі знаходзіліся ў следчым ізалятары №1 са снежня 2025 года, калі іх затрымалі паводле абвінавачвання ў замаху на садзейнічанне экстрэмісцкай дзейнасці (ч. 2 арт. 361-4 КК).

Гэта ўжо не першы крымінальны прысуд у сям'і Міронцавых. У жніўні 2020 года сёстры Вікторыя і Настасся заступіліся за людзей падчас жорсткіх затрыманняў ля сталічнага Палаца спорту. За гэта пазней яны атрымалі рэальныя тэрміны: Вікторыю асудзілі на два з паловай гады зняволення, а Настассю — на два гады калоніі. Абедзве дзяўчыны цалкам адбылі пакаранне і выйшлі на волю ў 2022 годзе. Яшчэ адна сястра, Аляксандра, ратуючыся ад магчымага арышту, паспела пакінуць Беларусь і з'ехала за мяжу.