Па справе ашуканскіх кол-цэнтраў у Мінску асудзілі 54 чалавек

У Мінскім гарадскім судзе абвешчаныя прысуды па справе махлярскіх кол-цэнтраў. Абвінавачанымі па справе праходзілі 15 кіраўнікоў і 39 удзельнікаў міжнароднай злачыннай арганізацыі. Офісы арганізацыі размяшчаліся ў Маскве, Бішкеку і Мінску.

Махлярскія кол-цэнтры дзейнічалі ў 2017-2024 гадах. Іх удзельнікі прапаноўвалі ахвярам атрымліваць пасіўны прыбытак ад інвестыцый у фінансавыя праекты, якіх насамрэч не існавала. Пацярпелых угаворвалі пералічыць грошы на рахункі, падкантрольныя арганізацыі. Агульны памер шкоды перавысіў 2 млн рублёў.

Следства па справе працягвалася паўтара года, а судовы працэс заняў 9 месяцаў.

Кіраўнікам злачыннай арганізацыі прысудзілі ад шасці да адзінаццаці з паловай гадоў са штрафам ад 1000 да 10 000 базавых велічыняў.

Шараговым удзельнікам прысудзілі ад 3 гадоў 3 месяцаў да 7 гадоў 6 месяцаў пазбаўлення волі. Таксама яны абавязаныя заплаціць штрафы — ад 600 да 4000 базавых велічыняў.

На карысць пацярпелых з абвінавачаных спагналі больш за 2,2 млн рублёў кампенсацыі, а таксама 15 тыс. рублёў — як кампенсацыю маральнай шкоды.