Школьнікаў з Мінска вывезуць у вайскова-патрыятычны лагер на Нёмане
Вайскова-патрыятычны лагер / ілюстрацыйнае фота / www.tribunapracy.by
У Беларусі пачаўся сезон вайскова-патрыятычных лагераў. У гэтым сезоне навучальна-палявыя зборы для вучняў 10-х класаў будуць масавымі.
Школьнікаў з Ленінскага раёна Мінска неўзабаве вывезуць у намётавы лагер на Нёман. Нават не чакаючы, калі прыйдзе лета.
Лагер пад назвай "Батальён 1.0" разгорнецца ў турыстычна-аздараўленчым комплексе "Высокі бераг". Там будуць "адпачываць" 280 юнакоў.
"Сумесна з вайсковай часткай 5448 мы арганізуем зборы ва ўмовах, максімальна набліжаных да знаходжання ў вайсковай частцы. Фармат — кругласутачны, — расказвае начальніца ўпраўлення па адукацыі адміністрацыі Ленінскага раёна Наталля Кучынская. — Хлопцы будуць жыць у намётах, харчавацца з палявой кухні, праходзіць страявую, тактычную, агнявую падрыхтоўку".
