Святар Анатоль Парахневіч у СІЗА перанёс інфаркт і знаходзіцца ў цяжкім стане
Ксёндз Анатоль Парахневіч падчас службы / Katolik.life
Па інфармацыі вернікаў, 65-гадовы каталіцкі святар Анатоль Парахневіч, які служыў у Вілейскім раёне і знаходзіцца пад вартай больш за месяц, перанёс інфаркт. Паведамляецца, што ён застаецца ў следчым ізалятары ў цяжкім стане, піша выданне Katolik.life.
Паводле даных вернікаў, святару прад’яўлена абвінавачанне ў "здрадзе дзяржаве". Канкрэтныя абставіны справы не раскрываюцца. Мяркуецца, што ён утрымліваецца ў СІЗА КДБ, а затрыманне праводзілі невядомыя ў масках, яго дом быў апячатаны.
Таксама адзначаецца, што раней па аналагічнай справе па абвінавачанні ў "здрадзе дзяржаве" быў асуджаны ксёндз Генрых Акалатовіч, які пазней быў вызвалены пры пасярэдніцтве Ватыкана за некалькі месяцаў да арышту Парахневіча.
