Туск заклікаў НАТА “сур’ёзна ставіцца” да словаў Мядзведзева пра дроны ў Еўропе

Прэм’ер-міністр Польшчы Дональд Туск пракаментаваў пагрозы намесніка старшыні Савета бяспекі РФ Дзмітрыя Мядзведзева і заклікаў партнёраў па NATO “сур’ёзна ставіцца” да іх.

“Польшча, краіны Балтыі, а цяпер і Румынія. Расійскіх правакацый становіцца ўсё больш. Учора былы прэзідэнт Расіі Дзмітрый Мядзведзеў заявіў, што спакойны сон грамадзян ЕС скончыўся”, — заявіў прэм’ер-міністр Польшчы.

Дональд Туск дадаў, што ўсім членам NATO варта “нарэшце пачаць сур’ёзна ставіцца да гэтых фактаў і словаў”.

Мядзведзеў у пятніцу “папярэдзіў” краіны Еўропы пра тое, што дроны, якія “блукаюць”, і надалей будуць залятаць на іх тэрыторыю. Ён зрабіў такую заяву пасля траплення расійскага дрона ў жылы будынак у Румыніі.

“Няхай яны рыхтуюцца: гэта будзе працягвацца. Ідзе вайна! І грамадзяне краін ЕС, як насельніцтва ваяўнічых краін, не змогуць спакойна спаць”, — заявіў ён.