Украіна бліжэйшым часам чакае Святлану Ціханоўскую — міністр замежных спраў
Уладзімір Зяленскі і Святлана Ціханоўская / прэс-служба Ціханоўскай
Лідарка беларускіх дэмакратычных сілаў Святлана Ціханоўская бліжэйшым часам можа прыехаць ва Украіну. Пра гэта падчас анлайн-брыфінгу 22 траўня заявіў міністр замежных спраў Украіны Андрэй Сібіга, перадае hromadske.
Напярэдадні Аляксандр Лукашэнка паведаміў, што гатовы сустракацца з Уладзімірам Зяленскім "у любым пункце" Украіны ці Беларусі. Сібіга пракаментаваў гэтую заяву так:
"Ніякага дыпламатычнага кантакту з Беларуссю апошнім часам не было. Нядаўна мы ўбачылі дзіўную заяву Лукашэнкі, што ён гатовы сустракацца і ехаць у Кіеў. Ва ўкраінскага боку ёсць з кім сустракацца".
Раней Ціханоўская сустрэлася з прэзідэнтам Украіны ў Вільні пры канцы студзеня. Тады яна выказала падтрымку ўкраінскаму народу, падзякавала за падтрымку дэмакратычнай Беларусі і за "тое, што ўкраінскае кіраўніцтва падзяляе беларусаў і рэжым". У адказ Зяленскі запрасіў Ціханоўскую прыехаць у Кіеў з візітам, але яго ўзгадненне, як бачым, зацягнулася.
