Ва Украіне прызначаюць спецпрадстаўніка для кантактаў з беларускімі дэмсіламі
Яраслаў Чарнагор / фота з яго старонкі ў Фэйсбуку
Украінскі эксперт па Беларусі і Расіі Яраслаў Чарнагор стаў амбасадарам па асаблівых даручэннях, якія адказваюць за кантакты з беларускімі дэмсіламі. Пра яго прызначэнне паведамілі ўкраінскія СМІ.
Сам Чарнагор не пацвярджае прызначэнне і называе паведамленне крыху заўчасным. У каментарах журналістам ён заявіў, што афіцйнага рашэння яшчэ няма. Аднак у сваіх сацсетках ён паведаміў, што перайшоў на дыпламатычную працу ў МЗС, дзе працуе ва ўпраўленні несяброўскіх краін.
"І галоўным фактарам маіх жыццёвых змяненняў застаецца краіна-агрэсар і яе сатэліт — пуцінская РФ і лукашэнкаўская РБ. Супрацьстаяць ім — гэта сур'ёзны выклік, і я яго прыняў", — піша Чарнагор.
Яраслаў Чарнагор — кандыдат гістарычных навук і дырэктар праграмы расійскіх і беларускіх даследаванняў Савета знешняй палітыкі "Украінская прызма". Ён займаецца даследаваннямі замежнай палітыкі Украіны, інфармацыйнай бяспекі, расійскай прапаганды і палітычных працэсаў у Беларусі і Расіі.
Пасада спецпрадстаўніка па сувязі з беларускімі дэмакратычнымі сіламі заставалася ва Украіне вакантнай пасля адстаўкі Ігара Кізіма ў лютым 2025 года.
