Выйшаў фільм "Моўныя партызаны", або Як мова становіцца формай супраціву
Фільм Таццяны Гаўрыльчык даследуе, як мова ператвараецца з культурнай з’явы ў свядомы палітычны выбар / Скриншот видео
На платформе Vodblisk выйшаў дэбютны фільм "Моўныя партызаны" кінематаграфісткі Таццяны Гаўрыльчык. Пра гэта піша канал "Священный Белавуд".
Фільм даследуе, як мова ператвараецца з культурнай з’явы ў свядомы палітычны выбар. Праз гісторыю адной сям’і паказваецца, як выкарыстанне беларускай мовы становіцца формай супраціву і штодзённай, ціхаю барацьбой.
У цэнтры сюжэта — Аліна і Ігар. Яны выхоўваюць дзіця і чакаюць нараджэння другога сына. Ужо больш за дзесяць гадоў яны робяць, здавалася б, простую рэч: пішуць звароты ў дзяржаўныя ўстановы і кампаніі, патрабуючы выканання закона — каб беларуская мова прысутнічала ў публічнай прасторы. У краіне, дзе яна фармальна існуе, але амаль не выкарыстоўваецца, гэта становіцца актам прынцыповай пазіцыі.
Фільм паказвае, як нават малыя дзеянні могуць мець значэнне і станавіцца формай супраціву.
Работа над стужкай пачалася ў 2022 годзе і вырасла з асабістага інтарэсу рэжысёркі да тэмы мовы.
Таццяна Гаўрыльчык — дакументалістка, выпускніца Беларускай дзяржаўнай акадэміі мастацтваў і міжнароднай праграмы Doc Nomads.
"Моўныя партызаны" — яе рэжысёрскі дэбют у кароткім метры. Раней яна працавала аператаркай над фільмамі, якія былі прадстаўлены на міжнародных фестывалях, у тым ліку Berlinale і IDFA.
Фільм ужо даступны для бясплатнага прагляду на платформе Vodblisk з любой кропкі свету пасля рэгістрацыі.
