З'ехаў, бо аказаўся ў сітуацыі "грамадзянскай смерці" — Семчанка

Былы кіраўнік "прэзідэнцкага пула" на тэлеканале АНТ Дзмітрый Семчанка быў вымушаны пакінуць Беларусь у 2025-м, бо аказаўся ў сітуацыі "грамадзянскай смерці". Пра гэта ён расказаў у інтэрв'ю праекту "Медыяжаба".

Семчанка адбыў трохгадовы тэрмін зняволення і выйшаў на волю ўлетку 2025 года. Аднак рэжым Лукашэнкі ўнёс яго ў "спіс тэрарыстаў". Таму Семчанка не мог ні адкрыць банкаўскі рахунак, ні зарэгістраваць сім-карту, ні нават знайсці працу — усё гэта трапляла пад "садзеянне тэрарызму". Калі ён рыхтаваў дакументы для візы, праблемай стала нават афармленне страхоўкі.

У інтэрв'ю Семчанка расказаў, што яго звальненне з тэлеканала не стала нечаканасцю для кіраўніцтва АНТ. Перад тым ён спрабаваў пераканаць начальства асвятляць перадвыбарчую кампанію 2020 года па-іншаму: "Мы былі нязгодныя ўсе, хто там быў на той момант. Я казаў, што гэтай хлуснёй вы злуеце людзей".

Пасля звальнення з АНТ Семчанку двойчы затрымлівалі паводле адміністрацыйных артыкулаў. У 2022-м пасля заканчэння другога адміністрацыйнага арышту на яго пачалі крымінальную справу.

Журналіст кажа, што справа грунтавалася на трох ягоных пастах у сацсетках. Гэта былі каментар пра тое, як тагачасны кіраўнік ГУБАЗіК Мікалай Карпянкоў разбіў вітрыну кавярні "O'petit", пост у памяць пра Рамана Бандарэнку і асуджэнне расійскага ўварвання ва Украіну. Камітэт судовых экспертыз, прааналізаваўшы яго пасты, не знайшоў у іх складу злачынства. Аднак следства далучыла да справы заключэнне ананімнага эксперта, які знайшоў неабходныя для абвінавачання прыкметы "распальвання сацыяльнай варожасці".

Праз нейкі час пасля вызвалення Семчанка з сям'ёй пераехаў у Польшчу і цяпер жыве ў Варшаве.