Беларускі бізнесовец, звязаны з атачэннем Лукашэнкі, атрымаў грамадзянства Украіны

Прадпрымальнік Артур Гранц, які мае грамадзянства Беларусі і Арменіі ды займаецца крамамі д'юці-фры, павялічыў свой даход ад бізнесу ва Украіне і атрымаў пашпарт гэтай дзяржавы. На гэта звярнула ўвагу Радыё Свабода.

Як вынікае з складзенага ўкраінскім рэсурсам Opendatabot рэйтынгу, у 2025 годзе Гранц павялічыў даход сваіх кампаній на 6,28% да 607 668 575 грыўняў (13 810 649 мільёнаў долараў у эквіваленце).

Гранц мае ва Украіне 12 кампаній. У яго ўласнасці знаходзіцца толькі адна, а ў астатніх 11 ён з'яўляецца бенефіцыярам. Кампаніі працуюць у розных сектарах — бязмытны гандаль алкаголем, гандаль адзеннем, друк часопісаў і выданняў, камп'ютарныя паслугі, рэстаранная дзейнасць, арэнда нерухомасці.

Літоўскае выданне LRT разам з журналістамі "Бюро" апублікавала 30 сакавіка вынікі расследавання пра тое, як прадпрымальнік фінансуе рэжым Лукашэнкі праз крамы бязмытнага гандлю і пры гэтым без праблем развівае бізнес у Літве. Ён мае адзін з самых дарагіх рэстаранаў у Вільні HeJi і шыкоўны гатэль Esperanza Resort у Троках.