“Гэта 100% — рэжым”: мы напісалі акаўнту, які сочыць за беларусамі ў Telegram
Перапіска з "ГУПК" / Euroradio
Беларусы пачалі посціць сторыс у Telegram, каб паглядзець, ці сочаць за імі супрацоўнікі МУС. Некаторыя дзеляцца назіраннямі ў сацсетках — за эмігрантамі “прыглядваюць” з даволі “паліўных” акаўнтаў.
Еўрарадыё сабрала шэсць такіх профіляў з лагатыпам МУС, якія былі падпісаны як “ГУПК”, “ПРОВЕРКА (Отдел №3)”, “МОНИТОРИНГ (Отдел №6)”, “СЛУЖЕБНЫЙ (Отдел №2)”.
ГУПК — гэта Галоўнае ўпраўленне па супрацьдзеянні кіберзлачыннасці, таксама вядомае як “Упраўленне К”.
27 красавіка ўсе гэтыя профілі змянілі назву на “Слежка 👀🕵️♂️”, адзін з іх адказаў на паведамленне Еўрарадыё. І вось што было далей.
“Я таксама супраць гэтых старпёраў Пу і Лу”
У першым жа паведамленні на наш допіс акаўнт “Слежка” адказаў:
“Вы прежде чем раздувать массовую панику подумайте следили бы за вами с аккаунта подписанным как «ГУПК». Плохой из вас журналист, похоже больше на жёлтую прессу и заголовок ради заголовка.
Слежка на то и слежка, чтобы делать это незаметно. А провокационный никнейм может для чего-то другого, а не за тем чтобы следить за белорусами? Не пробовали подумать в таком ключе? Расходимся, громкой журналистской статьи не будет :(”
Самае простае і эфектыўнае — не ўваходзіць у перапіску і блакіраваць
Прадстаўнік ByPol Станіслаў Лупаносаў сам калісь працаваў у ГУПК. У размове з Еўрарадыё ён пацвердзіў, што гэта “100% акаўнты рэжыму”.
— Яны глядзяць за ўсімі нашымі… Мы ж усе фігуранты крымінальных спраў, — заўважае былы сілавік.
Лупаносаў кажа, што супрацоўнікі ГУПК шукаюць акаўнты па публічных групах у Telegram, напрыклад “Беларусы Варшавы”, і ўсіх манітораць.
Калі мы распавялі пра сваю перапіску са “Слежкай”, Лупаносаў акрэсліў гісторыю акаўнта “легендай”.
— Гэты чалавек — супрацоўнік, які вырашыў вам распавесці такую легенду. Ён ужо вас ідэнтыфікаваў і вылівае канкрэтную дэзу.
Лупаносаў яшчэ параіў паглядзець ID акаўнта. Хутчэй за ўсё, ён не будзе ні ў якіх чатах, бо “супрацоўнікі нідзе не сядзяць, а проста манітораць”.
Таксама Лупаносаў звярнуў увагу: “Слежка” вельмі граматна піша, што адметна іменна для супрацоўнікаў.
— Калі спаліліся, то пачалі ўжо сляды падціраць, — так пракаментаваў змену аватара канала з правоў на аўто на коціка. — Калі б чалавек сапраўды гэтым [тэлеграм-маркетынгам. — Еўрарадыё] займаўся, то не пачаў бы вам гэта абгрунтоўваць.
Лупаносаў распавёў, што назвы “Маніторынг”, “Служэбны” ды іншыя — гэта абазначэнні, якія выкарыстоўваюць сілавікі для ўнутраных рапартаў.
— Яму ж у рапарце трэба запісаць, што інфармацыю, напрыклад, атрымаў з акаўнта “ГУПК №8”, каб для начальніка гучала прыгожа і правільна. З іншымі нікнэймамі не прапусцяць.
Гэта ўсё стаіць на фінансавым уліку ў аддзеле, бо за іх плацяцца грошы. І там, хутчэй, будуць не венесуэльскія нумары, а беларускія. Бо не дай бог іх увядуць махляры — каб не было перапісак і гісторыі сачэння.
— А чаму тады яны вырашылі перайменавацца?
— Дзіцячая тэма. Не ведаю, што яшчэ сказаць. Яны ж спаліліся, то таму і напісалі там, бо так пра іх цяпер пішуць.
Станіслаў Лупаносаў дадае, што калі беларусы заўважылі за сабою такую “слежку” ў Telegram, то варта не пачынаць перапіску, а проста заблакіраваць акаўнт, каб ён не глядзеў вашы гісторыі.
Ці можа быць такое назіранне небяспечным для беларусаў? Лупаносаў лічыць, што гэта якраз небяспечна для тых, хто ездзіць у Беларусь.
