Калеснікава заявіла, што "не змагалася супраць Лукашэнкі". Фядута рэзка адказаў

Марыя Калеснікава прапануе Еўропе не змагацца з Лукашэнкам, а змагацца "за людзей, за іх будучыню". Такі погляд была палітзняволеная агучыла на канферэнцыі GLOBSEC у Празе.

"У 2020 я змагалася не супраць Лукашэнкі, а за людзей, свабоду і свабодныя выбары", — сказала Калеснікава.

Калеснікавай на гэтыя словы рэзка адказаў былы палітвязень Аляксандр Фядута.

"Прабачце за рэзкасць, але нікога не цікавіць, за што Вы змагаліся ў 2020 годзе (магчыма, акрамя мядзведзяў з берлінскага заапарка, якія Вас атачаюць). Бо галасавалі не за вашы перакананні, музычны слых і чырвоную памаду. Сотні тысяч людзей выходзілі на пікеты, каб паставіць подпісы не "за", а "супраць". І галасавалі яны не "за", а "супраць".

Да гонару Святланы Ціханоўскай трэба сказаць, што яна гэта разумела тады і, здаецца, разумее цяпер.

Акрамя таго, прайшло пяць з паловай гадоў, вельмі насычаных. Ідзе Вялікая еўрапейская вайна, як бы і хто б гэта ні называў. І на фоне гэтай вайны Вы заклікаеце да дыялогу з агрэсарам, якога каментатары беларускіх медыя ў выгнанні сарамліва называюць "пры ўдзеле", — піша Фядута ў фэйсбуку.

Свой допіс экс-палітвязень скончыў словамі: "Маша, паглядзіце ў люстэрка і проста падумайце пра ўсё гэта".