Колькі будуць каштаваць вучэбна-палявыя зборы школьнікаў?

З канца траўня ў Беларусі пачнуцца вучэбна-палявыя зборы для дзесяцікласнікаў. З гэтага года гэта стала абавязковай часткай праграмы па прадмеце "Дапрызыўная і медыцынская падрыхтоўка". Выданне "Флагшток" вывучыла тэндары на правядзенне збораў і высветліла, у колькі гэта абыдзецца.

У некалькіх раёнах Беларусі з мясцовых бюджэтаў ужо закупляюць снаражэнне для правядзення вучэбна-палявых збораў. Сярод іх пнеўматычныя вінтоўкі, макеты аўтамата, гранат і штык-нажа, процівагазы, насілкі, медыцынскія камплекты, палаткі, ложкі, компасы і лапаты. Да прыкладу, кошт адной пнеўматычнай вінтоўкі — амаль 2,4 тысячы рублёў.

Асобны артыкул выдаткаў — харчаванне. У Гомелі для школ Навабеліцкага раёна на арганізацыю харчавання выдзелена больш за 32 тысячы рублёў. Зборы тут пачнуцца 26 мая.

Харчаванне дзяўчынак, якія будуць прыходзіць на зборы з дому, прадугледжана ў выглядзе абеду за 3,54 рубля. А хлопчыкаў, якія на зборах павінны знаходзіцца кругласуткава, будуць карміць 5 разоў на дзень — 12,19 рублёў на аднаго школьніка.

Усяго ў Навабеліцкім раёне зборы павінны прайсці 424 дзесяцікласнікі, большасць з якіх — дзяўчынкі.

Ухіліцца ад збораў не атрымаецца: без адзнакі аб праходжанні вучань не будзе атэставаны па прадмеце.