У Наваполацку адбыўся хапун за "сувязі з экстрэмістамі"

Не менш за 12 жанчын затрымалі падчас хапуну 23 красавіка ў Наваполацку.

Як паведамляюць праваабаронцы з "Віцебскай Вясны", ва ўсіх затрыманых дома правялі ператрусы. Некалькі чалавек адразу адвезлі ў віцебскі СІЗА, астатніх дапытвалі ў Наваполацку. Васьмярых з іх адпусцілі тым самым вечарам.

У адной з затрыманых знайшлі падпіскі на інфармацыйныя рэсурсы, якія ў Беларусі цяпер лічацца "экстрэмісцкімі". Жанчыну пратрымалі пад вартай трое сутак, а ў панядзелак, 27 красавіка, прысудзілі адміністрацыйны штраф.

Вядома, што па стане на 28 красавіка прынамсі дзве жанчыны заставаліся за кратамі.

З усіх жанчын узялі падпіскі аб нявыездзе і неразгалошванні.

Праваабаронцы мяркуюць, што ператрусы і затрыманні былі звязаныя дзейнасцю жанчын у культурніцкіх праектах і сталі наступствам таго, што 9 красавіка МУС прызнаў "экстрэмісцкімі фармаваннямі" шэраг культурніцкіх ініцыятываў. Абвешчана пра гэта было толькі 24 красавіка, а затрыманні адбыліся напярэдадні.  

Дарэчы, затрыманні адбыліся не толькі ў Наваполацку: трох жанчын 23 красавіка затрымалі ў Барысаве, яшчэ некалькі — у Слоніме, Брэсце і Жодзіне.