Выданне "Флагшток" паведамляе пра ператрусы ў бацькоў сваіх супрацоўнікаў
Супрацоўнік ГУБАЗіКа, ілюстрацыйнае фота
19 траўня супрацоўнікі ГУБАЗіКа правялі ператрусы ў бацькоў двух чалавек, якія маюць дачыненне да гомельскага выдання "Флагшток". Пра гэта паведамляе само медыя.
Адзін з супрацоўнікаў ГУБАЗіКа адкрыта заявіў, што падобныя дзеянні будуць працягвацца да таго часу, пакуль на "Флагштоку" будуць выходзіць новыя публікацыі.
"Рэдакцыя Флагштока разглядае гэтыя дзеянні сілавых структур у кантэксце падзей апошніх гадоў — з 2022 года Гомельская вобласць апынулася ўцягнутай у вайсковую актыўнасць у сувязі з вайной Расіі супраць Украіны. Не выключана, што на фоне магчымай эскалацыі сітуацыі адбываецца спроба загадзя зачысціць інфармацыйную прастору ад незалежных і непадкантрольных медыя", — адзначаецца ў заяве выдання.
Рэдакцыя адзначае, што за шэсць гадоў працы вакол медыя сфармавалася вялікая каманда, якая працягвае абнаўляцца і развівацца. Некаторыя з заснавальнікаў даўно пакінулі яе і дзейнічаюць незалежна ад "Флагштока".
"Таму ціск на канкрэтных людзей можа разглядацца толькі як чарговая спроба запалохвання і ціску на незалежныя медыя ў Беларусі", — адзначаюць у "Флагштоку".
