Выхадзец з Беларусі прыняў прысягу як кіраўнік "Масада"
Раман Гофман, кіраўнік Масад / Масад
Ураджэнец Беларусі Раман Гофман прыняў прысягу як новы кіраўнік ізраільскай разведслужбы "Масад". Ён будзе ўзначальваць разведслужбу пяць гадоў, піша выданнеThe Times of Israel.
Гофман нарадзіўся ў Мазыры ў 1976 годзе. У 1990 годзе яго сям’я рэпатрыявалася ў Ізраіль. У 2023 годзе ён займаў пасаду камандуючага Цэнтрам баявой падрыхтоўкі сухапутных войскаў і ўдзельнічаў у адбіцці нападу ХАМАС на Ізраіль. У баях атрымаў цяжкае раненне. У красавіку 2024 года Гофман быў прызначаны вайсковым сакратаром прэм’ера.
Прэм'ер-міністр Біньямін Нетаньяху абвясціў пра прызначэнне Гофмана ў "Масад" яшчэ ў снежні 2025 года, аднак пасля гэтага ягоны былы вайсковы сакратар сутыкнуўся з працяглымі судовымі паседжаннямі. Яго абвінавачвалі ў парушэнні этычных стандартаў у працы і патрабавалі ануляваць прызначэнне. Аднак напярэдадні цырымоніі прынясення прысягі Вярхоўны суд адхіліў гэтае хадайніцтва.
Падчас цырымоніі прысягі Нетаньяху заявіў, што місія кіраўніка "Масада" — забяспечыць, каб Іран больш не ўяўляў пагрозы.
