Wildberries выдаліў са свайго сайта раздзел "Усё для СВА".

Wildberries выдаліў са свайго сайта раздзел "Усё для СВА". І з мабільнай праграмы таксама. Увогуле, калі ў вас яшчэ былі пытанні пра тое, чаму Украіна б'е па лагістычных хабах маркетплэйса — проста падумайце пра тое, што там быў такі раздзел.

У ім налічвалася больш за 200 тысяч пазіцый. Але цяпер ён недасяжны. Хаця вайсковыя тавары на WB усё яшчэ прадаюцца: бронекамізэлькі і шлемы можна знайсці ў раздзеле "Спорт", а FPV-дроны і камплектуючыя — у раздзеле "ТБ, Аўдыё, Фота, Відэа тэхніка".

За апошнія тыдзні ўкраінцы атакавалі адразу некалькі складоў Wildberries у Расіі. Уладзімір Зяленскі патлумачыў, што гэтыя аб'екты задзейнічаныя ў ланцугу паставак для вытворчасці БПЛА і навігацыйнага абсталявання.