З Беларусі ва Украіну залятаў паветраны шар, ён узмацняе сігнал расійскім дронам
Расійскі дрон ціпа "Шахед" / NBC
Памежнікі Украіны паведамілі, што ўвечары 2 траўня з тэрыторыі Беларусі ва Украіну залятаў паветраны шар, які з’яўляецца рэтранслятарам і дапамагае расійскім паветраным цэлям падчас абстрэлаў.
Спікер Дзяржаўнай памежнай службы Украіны Андрэй Дземчанка заявіў, што "пагроза з боку Беларусі ніколі не знікае". Украінскі бок упэўнены, што "будуць спробы дэстабілізаваць сітуацыю на кірунку нашай мяжы, не выключаем правакацый".
Нагадаем, што раней выступаў Уладзімір Зяленскі, які казаў пра "незвычайную актыўнасць" на беларуска-ўкраінскай мяжы.
Раней Расія актыўна выкарыстоўвала грамадзянскую інфраструктуру, у прыватнасці вышкі сотавай сувязі на тэрыторыі Беларусі, для пракладання маршрутаў сваіх дронаў. Пра гэта гаворыцца ў расследаванні міжнароднай разведвальнай супольнасці InformNapalm.
