За кантрабанду цыгарэт у ЕС чыгуначнаму дыспетчару прысудзілі два гады
Цягнік, ілюстрацыйнае фота / pixabay.com
Вынесены прысуд чыгуначнаму дыспетчару, які ўдзельнічаў у кантрабандзе цыгарэтаў у краіны Еўрасаюза.
Андрэя Гаўрылюка затрымалі на пачатку лістапада 2025 года. Спярша яго вінавацілі не толькі ў датычнасці да кантрабанды цыгарэт, але і ў дзяржаўнай здрадзе. Аднак суд прызнаў яго вінаватым толькі ў перавышэнні службовых паўнамоцтваў, адзначаюць у Супольнасці чыгуначнікаў Беларусі.
Па версіі следства, на маршруце ад Оршы да Баранавічаў Гаўрылюк, карыстаючыся службовым становішчам, прыпыняў таварныя цягнікі і паведамляў саўдзельнікам месца і час іх стаянкі. Яны карысталіся гэтым, каб загрузаць у цягнікі кантэйнеры з кантрабандай. Фармальна такія прыпынкі маглі абгрунтоўвацца неабходнасцю пропуску цягнікоў па асноўнай лініі Мінск-Брэст.
У выніку дыспетчару прысудзілі два гады пазбаўлення волі без канфіскацыі маёмасці. Гэта ніжняя мяжа санкцыі па выстаўленым яму артыкуле.
