ЗША папрасілі тры краіны зняць санкцыі з беларускага калію

Злучаныя Штаты папрасілі Літву, Польшчу і Украіну зняць санкцыі з беларускіх калійных угнаенняў і дазволіць транзіт прадукцыі праз іх тэрыторыю. Пра гэта сведчыць неафіцыйны зварот Дзярждэпартамента ЗША, з якім азнаёмілася Радыё Свабода.

"Цяпер, калі Злучаныя Штаты знялі амерыканскія санкцыі з "Беларуськалія", амерыканскія кампаніі зацікаўленыя ў набыцці і транспартаванні беларускага калію. Для гэтага спатрэбіцца транзіт праз краіны ЕС, якія мяжуюць з Беларуссю, ці праз Украіну, каб пазбегнуць транспартавання праз Расію", — гаворыцца ў гэтым лісце.

Таксама ў звароце адзначаецца, што ЗША зацікаўленыя вывучыць патэнцыйныя маршруты для транзіту беларускага калію "з мэтай змякчэння глабальнага дэфіцыту праз Польшчу, Літву або Украіну і чакаюць будучых абмеркаванняў гэтай тэмы з вамі".

У МЗС Украіны журналістам Свабоды пацвердзілі атрыманне гэтага ліста. Міністр замежных справаў Літвы Кястуціс Будрыс нядаўна казаў пра наяўнасць такога ціску з боку ЗША.

Злучаныя Штаты ў сакавіку знялі санкцыі з "Беларуськалія", Беларускай калійнай кампаніі ды кампаніі "Аграразвіццё" — у абмен на вызваленне 250 палітвязняў.

Тым часам ЕС аднагалосна падоўжыў санкцыі яшчэ на год. Пад абмежаванні трапіў імпарт беларускіх калійных угнаенняў, а таксама былі падоўжаныя адрасныя санкцыі супраць кампаніяў — напрыклад, таго ж "Беларуськалія".

У лісце гаворыцца, што беларускія калійныя ўгнаенні будуць канкураваць з расійскімі: "Любая закупка беларускага калію Захадам можа пазбавіць Расію магчымасці прадаваць уласны калій і не дазволіць ёй атрымліваць выгаду ад транзітных збораў".

Таксама Дзярждэп прапануе накіраваць прыбытак ад транзіту калію на падтрымку Украіны: "Частка або ўсе транзітныя зборы, атрыманыя ў рамках гэтай дамоўленасці, могуць быць накіраваныя краінай транзіту ў спецыяльны фонд падтрымкі самаабароны Украіны".