Аляксей Хлястоў запісаў відэа на выпадак затрымання

У Інстаграм-акаўнце Аляксея Хлястова, якога затрымалі ў ноч на пятніцу, з'явілася відэа, запісанае на выпадак затрымання. Спявак кажа, што апошнім часам яго некалькі разоў выклікалі на "прафілактычныя гутарккі".

"Калі я запісваю гэта відэа, значыць, я не дома і не на працы. Хутчэй за ўсё, я знаходжуся на прафілактычнай так званай гутарцы, якая ўжо адбываецца трэці раз", — кажа Хлястоў.

Ён кажа, што спярша яго выклікалі ў ДАІ — нібыта з нагоды парушэння ПДР: ён, маўляў, карыстаўся мабільным тэлефонам падчас руху. "І там я быў, скажам так, давайце назавем — запрошаны прадстаўнікамі ГУБАЗіК на вуліцу Рэвалюцыйная, 3. Там знаходзячыся, была вельмі незразумелая гутарка, зусім незразумелая. На што я, уласна кажучы, не змог нічога адказаць", — расказвае Хлястоў.

Паводле яго, гэтая размова адбылася ў мінулую пятніцу, а ў панядзелак яго выклікалі ГУУС. Потым яго запрасілі ў транспартную інспекцыю на Партызанскі праспект, 6.

"Папрасілі прыехаць, але я мяркую, што будзе такая ж гісторыя. Гэта значыць, я туды прыеду, і далей я буду альбо затрыманы, альбо запрошаны для чарговай гутаркі. У сваю чаргу хачу сказаць, што ніякія неправамерныя дзеянні я ніколі не рабіў, нічога супрацьзаконнага не здзяйсняў, і таму прашу распаўсюдзіць гэтае відэа, каб звярнулі ўвагу сапраўды тыя органы, якія могуць абараніць мяне як грамадзяніна Рэспублікі Беларусь", — сказаў Хлястоў.

Аляксей Хлястоў быў адным з самых папулярных спевакоў Беларусі, удзельнічаў у разнастаўных канцэртах, пра яго пісала дзяржпрэса і паказвалі на тэлевізіі. Але пасля 2020 года спявак трапіў у "чорны спіс", і яму забаранілі выступаць. У 2025-м стала вядома, што Хлястоў працуе ў таксі.