Ніякіх перамоваў пра транзіт беларускага калію не вядзецца — дарадца прэм'ера Літвы

Літва не вядзе ніякіх перамоваў пра транзіт беларускага калію праз сваю тэрыторыю. Пра гэта заявіў дарадца прэм'ера Літвы Ігнас Дабравольскас.

Напярэдадні ў СМІ шырока разышліся словы міністра замежных спраў Літвы Кястуціса Будрыса, што адміністрацыя ЗША пачала ціск на Літву, каб аднавіць транзіт беларускіх калійных угнаенняў.

"Заявы міністра і іх кантэкст спачатку павінна пракаментаваць само міністэрства замежных спраў. Я магу паўтарыць пазыцыю, выказаную прэм'ер-міністрам. Мы ўдзячныя ЗША за іх намаганні па аказанні дапамогі ў вырашэнні пытанняў па Беларусі ў такіх галінах, як перамяшчэнне фур, інцыдэнты з паветранымі шарамі і вызваленне палітычных зняволеных. Аднак ніякіх перамоваў пра транзіт беларускіх угнаенняў праз Літву не вядзецца", — перадае DELFI словы Дабравольскаса.

Ён заявіў, што Літва падтрымлівае санкцыі, уведзеныя Еўрасаюзам супраць Беларусі. "Ва ўмовах дзейных санкцый ЕС пытанне транзіту ўгнаенняў абмяркоўвацца не можа", — дадаў ён.

Таксама Дабравольскас пракаментаваў магчымасць сустрэчы прадстаўнікоў Літвы і Беларусі на тэхнічным узроўні. Паводле яго, яна магчымая толькі пры ўмовах, раней агучаных прэм'ер-міністрам Літвы: пасля спынення інцыдэнтаў з метэазондамі, вяртання ўсіх затрыманых фур без дадатковых грашовых збораў і спынення незаконнай міграцыі праз мяжу.

Дарэчы, міністр замежных справаў Будрыс таксама казаў, што Літва прытрымліваецца агульнай санкцыйнай палітыкі ЕС, таму абмяркоўваць зняцце санкцый цяпер няма сэнсу.