Прарасійскія сілы перамагаюць на парламенцкіх выбарах у Балгарыі

Альянс “Прагрэсіўная Балгарыя” перамагае на парламенцкіх выбарах, якія адбыліся ў Балгарыі 19 красавіка. Паводле стану на 13.00 (час у Сафіі) апрацавана 98,33%, паведамляе балгарская ЦВК.

“Прагрэсіўная Балгарыя”, якую ўзначальвае былы прэзідэнт краіны Румен Радзеў, атрымлівае 44,6%. Такім чынам, кааліцыя атрымала нават больш галасоў, чым прадказвалі экзіт-полы, паводле якіх яна магла разлічваць на падтрымку 39% выбарцаў, адзначае выданне The Insider.

Далей ідуць кіроўная партыя ГЕРБ-СДС былога прэм’ер-міністра Бойка Барысава з 13,3% і “Працягваем перамены — Дэмакратычная Балгарыя” з 12,7%.

62-гадовы Румен Радзеў быў прэзідэнтам Балгарыі ў 2016–2026 гадах. Яго лічаць прагматычным, некалькі прарасійскім лідарам, які крытыкаваў санкцыі ЕС і заклікаў да канструктыўнага дыялогу з Крамлём. Ён таксама выступае супраць ваеннай падтрымкі Украіны з боку Балгарыі.