Упаў на вачах першакласнікаў — новыя падрабязнасці крушэння мотадэльтаплана пад Мінскам

Сведкамі катастрофы мотадэльтаплана, у якой загінулі два чалавекі, сталі першакласнікі адной з мінскіх школаў. Якраз у гэты час яны прыехалі на экскурсію ў музей этнаграфіі ў Строчыцах. Пра гэта піша выданне Onlíner са словаў бацькі аднаго са школьнікаў.

"Калі мы ішлі з дзіцем дадому, ён стаў распавядаць, што падчас экскурсіі бачыў, як узлятаў, а потым падаў дэльтаплан, як пасля прыехалі хуткія. Спачатку я падумаў, што дзіця проста пераказвае нейкі сюжэт з гульні, але ўвечары, пачытаўшы навіны, зразумеў, што дзеці бачылі ўсё ў рэальнасці", — расказаў мужчына.

Настаўніцы, якая суправаджала дзяцей падчас экскурсіі, кажа, што на экскурсію адправіліся вучні не толькі першых, але і другіх класаў. Паводле яе, дзеці знаходзіліся далёка ад месца падзення.

"Мы стаялі ля вясковай школы, калі ўзляцеў мотадэльтаплан. Дзеці, натуральна, сталі сачыць за палётам. Літаральна праз секундаў дваццаць ён стаў рэзка зніжацца. Было зразумела, што ён падае. Мы знаходзіліся досыць далёка ад таго месца, таму толькі чулі гук удару апарата аб зямлю".

Настаўніца кажа, што яны бачылі, як да месца трагедыі ехалі хуткія і ратавальнікі. Экскурсія працягвалася яшчэ хвілін дваццаць. "Жудасна, вядома, ўсведамляць, што ты стаў сведкам такой трагедыі", — дадае жанчына.

Аэраклуб "Авія-Мінск", да якога належаў пілот, размяшчаецца ў аграгарадку Азярцо на тэрыторыі Беларускага дзяржаўнага музея народнай архітэктуры і побыту. Яго ўзлётна-пасадачная паласа знаходзіцца крыху ўбаку ад экскурсійных маршрутаў.

У музеі кажуць, што цяпер палёты прыпыненыя на нявызначаны тэрмін.

14 красавіка ў Мінскім раёне разбіўся мотадэльтаплан. Загінулі два чалавекі — 45-гадовы пілот (былы гітарыст гурта "Цвет Алоэ" Руслан Іваноў) і 26-гадовая пасажырка.